އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނަށް ޢަމަލުކުރުމުގެ ސަބްއިންޑެކްސްއިން އެންމެ މަތީ ދަރަޖަ ތިލަދުންމަތީ އުތުރުބުރީ އަތޮޅު ކައުންސިލަށް ލިބިއްޖެ

ކޮންމެ އަހަރަކުވެސް އަތޮޅުކައުންސިލް ތަކާއި ރަށުކައުންސިލްތައް ދަރަޖަކޮށް ވަނަވަނައަށް އަންނަ ފަރާތްތަކަށް ލޯކަލް ގަވަރމަންޓް އޮތޯރިޓީން ދެމުން ގެންދާ “ކަންގަތި އެވޯޑް” ގެ ތެރެއިން 2023 ވަނައަހަރު ޕަރފޯމަންސް އިންޑެކްސްގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނަށް އަމަލުކުރުމުގެ ސަބްއިންޑެކްސްއިން އެންމެ މަތީ ދަރަޖަ ހާސިލްކޮށްގެން “މާރާދަ” ހަނދާނީ ފިލާ ތިލަދުންމަތީ އުތުރުބުރީ އަތޮޅު ކައުންސިލަށް ލިބިއްޖެއެވެ.

ކައުންސިލްތަކުގެ މަސައްކަތް ރޭންކުކޮށް ލޯކަލް ގަވަމަންޓު އޮތޯރިޓީ އިން ދޭ ކަންގަތި އެވޯޑު ޙަފްލާ ބާއްވާފައި ވަނީ 2024 ޑިސެންބަރު 19 ވަނަ ދުވަހުގެ ރެއެވެ. އެ ރަސްމިއްޔާތުގައި ތިލަދުންމަތީ އުތުރުބުރީ އަތޮޅު ކައުންސިލަށް ލިބުނު މާރާދަ ހަނދާނީ ފިލަޔާ ޙަވާލުވެ ވަޑައިގެންނެވީ ތިލަދުންމަތީ އުތުރުބުރީ އަތޮޅު ކައުންސިލްގެ ރައީސް މޫޝާ ޝަފީޤެވެ. އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނަށް އަމަލުކުރުމުގެ ސަބްއިންޑެކްސްއިން 2020 ވަނަ އަހަރުން ފެށިގެން ކޮންމެ އަހަރަކު ވެސް ތިލަދުންމަތީ އުތުރުބުރީ އަތޮޅު ކައުންސިލުން މި އެވޯޑު ހާސިލްކުރެއެވެ.

ކަންގަތި އެވޯޑަކީ ލޯކަލް ކައުންސިލްތައް މިންކުރުމަށް އެކުލަވާލާފައިވާ ޕާރފޯމަންސް އިންޑެކްސްގެ ދަރަޖަތަކަށް ބަލައި އެންމެ ރަނގަޅު މަސައްކަތްތަކެއް ކުރަމުން އަންނަ ކައުންސިލްތަކަށް އެލްޖީއޭ އިން ދޭ އެވޯޑެކެވެ. 2023 ވަނަ އަހަރު ވަނައަހަރުގެ ޕާރފޯމަންސް އިންޑެކްސްގެ އަތޮޅު ކައުންސިލް ތަކުގެ ރޭންކުން އެންމެ ރަގަނޅު 05 ކައުންސިލްގެ ތެރޭގައި ވެސް ތިލަދުންމަތީ އުތުރުބުރީ އަތޮޅު ކައުންސިލް ހިމެނެއެވެ.