ޢަބްދުﷲ ނަޢީމް– ( ރިޓައަރ ކުރައްވާފައި )
މި އިދާރާގެ ކައުންސިލް އެގްޒެކެޓިވް މަޤާމުގައި ހުންނެވި ހއ. ދިއްދޫ ނަފާ އަލްފާޟިލް ޢަބްދުﷲ ނަޢީމް 2025 ޑިސެންބަރު 22 ގައި ވަނީ ރިޓައަރ ކުރައްވާފައެވެ.
އަލްފާޟިލް ޢަބްދުﷲ ނަޢީމް ހއ. އަތޮޅު އޮފީހާއި ގުޅިވަޑައިގެންނެވީ 1983 ސެޕްޓެންބަރު 20 ގައި، ރޭޑިޔޯޓެލްފޯން އޮޕަރޭޓަރެއްގެ މަޤާމަށެވެ. އޭގެފަހުން ޢަބްދުﷲ ނަޢީމް އަދާކުރެއްވި ވަޒީފާތަކުގެ ތެރޭގައި އަތޮޅު އޮފީހުގެ ސެކްރެޓަރީކަމާއި، ސީނިޔަރ ސެކްރެޓަރީކަމާއި، އަތޮޅުވެރިޔާގެ އެހީތެރިކަމާއި، އަތޮޅުވެރިޔާގެ އިސްއެހީތެރިކަމާއި، ޑެޕިއުޓީ ޑިރެކްޓަރުކަމާއި ޑިރެކްޓަރުކަން ހިމެނެއެވެ.
އަލްފާޟިލް ޢަބްދުﷲ ނަޢީމް ރިޓަޔަރ ކުރެއްވި އިރު ހުންނެވީ މި ކައުންސިލްގެ ކައުންސިލް އެގްޒެކެޓިވް މަޤާމުގައެވެ. އަލްފާޟިލް ޢަބްދުﷲ ނަޢީމް މެދު ނުކެނޑި 42 އަހަރަށް ވުރެ ގިނަދުވަހު ދައުލަތަށް ކޮށްދެއްވާފައިވާ އަގުހުރި މަސައްކަތަށް ޓަކައި އަތޮޅު ކައުންސިލްގެ ނަމުގައި ވަރަށް އިޚްލާޞްތެރި ކަމާއެކު ޝުކުރު ދަންނަވަމެވެ.
ޢަބްދުﷲ ނަޢީމް ވަނީ، ބެޗްލަރ އޮފް ޝަރީޢާ އެންޑް ލޯ އާއި ބެޗްލަރ އޮފް ޓީޗިން ޤުރްއާން ޙާޞިލް ކުރައްވާފައެވެ.
އާދަމް ސަޢީދު– ( ރިޓައަރ ކުރައްވާފައި )
މި އިދާރާގެ ލީގަލް އޮފިސަރ މަޤާމުގައި ހުންނެވި ހއ. ދިއްދޫ ސަމާ އަލްފާޟިލް އާދަމް ސަޢީދު 2025 ޑިސެންބަރު 22 ގައި ވަނީ ރިޓަޔަރ ކުރައްވާފައެވެ.
އަލްފާޟިލް އާދަމް ސަޢީދު ހއ. އަތޮޅު އޮފީހާއި ގުޅިވަޑައިގެންނެވީ 1992 ޖޫން 04 ގައި، ސީނިޔަރ ކްލާކެއްގެ މަޤާމަށެވެ. އޭގެފަހުން އާދަމް ސަޢީދު އަދާކުރެއްވި މަޤާމުތަކުގެ ތެރޭގައި އަތޮޅު އޮފީހުގެ އެސިސްޓެންޓް ސެކްރެޓަރީކަމާއި، ސީނިޔަރ އެޑްމިނިސްޓްރޭޓިވް އޮފިސަރކަމާއި، އިކޮނޮމިކް ޑިވެލޮޕްމަންޓް އޮފިސަރކަމާއި، އެސިސްޓެންޓް ޑިރެކްޓަރކަން ހިމެނެއެވެ.
އަލްފާޟިލް އާދަމް ސަޢީދު ރިޓަޔަރ ކުރެއްވި އިރު ހުންނެވީ މި ކައުންސިލްގެ ލީގަލް އޮފިސަރ މަޤާމުގައެވެ. އަލްފާޟިލް އާދަމް ސަޢީދު މެދު ނުކެނޑި 39 އަހަރަށް ވުރެ ގިނަދުވަހު ދައުލަތަށް ކޮށްދެއްވާފައިވާ އަގުހުރި މަސައްކަތަށް ޓަކައި އަތޮޅު ކައުންސިލްގެ ނަމުގައި ވަރަށް އިޚްލާޞްތެރި ކަމާއެކު ޝުކުރު ދަންނަވަމެވެ.
އަލްފާޟިލް އާދަމް ސަޢީދު ސަރުކާރުގެ ޚިދުމަތަށް އެންމެ ފުރަތަމަ ވެންނެވީ 1986 އޮގަސްޓު 5ވަނަ ދުވަހު ދިވެހިރާއްޖޭގެ ތަޢުލީމު ކުރިއަރުވާ މަރުކަޒުގެ ކާތިބުކަމުގެ މަޤާމަށެވެ. އޭގެފަހުން މިނިސްޓްރީ އޮފް ހޯމް އެފެއާޒް އެންޑް ސޯޝަލް ސަރވިސް އާއި މިނިސްޓްރީ އޮފް ހޯމް އެފެއާޒް އެންޑް ސްޕޯޓްސްގެ ކާތިބުކަމާއި، އައިޑެންޓިޓީކާޑު ޔުނިޓްގެ ރެކޯޑްސް ކްލާކްކަމާއި، ދިއްދޫ ކުޑަކަތީބުކަމާއި، ކަތީބުކަމާއި، ބޮޑުކަތީބުކަން އަދާކުރައްވާފައިވެއެވެ.
އާދަމް ސަޢީދު ވަނީ، ބެޗްލަރ އޮފް ޝަރީޢާ އެންޑް ލޯ އާއި މާސްޓާރ އޮފް ޝަރީޢާ އެންޑް ލޯ (ސްޕެޝަލައިޒޭޝަން އިން ކްރިމިނަލް ލޯ) ޙާޞިލް ކުރައްވާފައެވެ.
ޢާޞިމާ ޢަލީ– ( ރިޓައަރ ކުރައްވާފައި )
މި އިދާރާގެ އެސިސްޓެންޓް ކައުންސިލް އޮފިސަރ މަޤާމުގައި ހުންނެވި ހއ. ދިއްދޫ ހަވޭލި އަލްފާޟިލާ ޢާޞިމާ ޢަލީ 2025 ފެބުރުވަރީ 19 ގައި ވަނީ ރިޓަޔަރ ކުރައްވާފައެވެ.
އަލްފާޟިލާ ޢާޞިމާ ޢަލީ ހއ. އަތޮޅު އޮފީހާއި ގުޅިވަޑައިގެންނެވީ 1986 އެޕްރީލް 19 ގވަނަ ދުވަހު ކާތިބާއެއްގެ މަޤާމަށެވެ. އޭގެފަހުން ޢާޞިމާ ޢަލީ އަދާކުރެއްވި މަޤާމުތަކުގެ ތެރޭގައި އަތޮޅު އޮފީހުގެ ސީނިއަރ ކްލާކްކަމާއި، އެސިސްޓެންޓް ސެކްރެޓަރީކަމާއި، ސެކްރެޓަރީކަމާއި، އެޑްމިނިސްޓްރޭޓިވް އޮފިސަރކަން ހިމެނެއެވެ.
އަލްފާޟިލާ ޢާޞިމާ ޢަލީ ރިޓަޔަރ ކުރެއްވިއިރު ހުންނެވީ މި ކައުންސިލްގެ އެސިސްޓެންޓް ކައުންސިލް އޮފިސަރގެ މަޤާމުގައެވެ. އަލްފާޟިލާ ޢާޞިމާ ޢަލީ މެދު ނުކެނޑި 38 އަހަރަށް ވުރެ ގިނަދުވަހު ދައުލަތަށް ކޮށްދެއްވާފައިވާ އަގުހުރި މަސައްކަތަށް ޓަކައި އަތޮޅު ކައުންސިލްގެ ނަމުގައި ވަރަށް އިޚްލާޞްތެރި ކަމާއެކު ޝުކުރު ދަންނަވަމެވެ.
މުހައްމަދު ނަޞީރު – ( ރިޓައަރ ކުރައްވާފައި )
މި އިދާރާގެ ޑިރެކްޓަރގެ މަޤާމުގައި ހުންނެވި ހއ. ދިއްދޫ ” ތިލަދޫ ” އަލްފާޟިލް މުޙައްމަދު ނަޞީރު 31 މެއި 2021 ގައި ވަނީ ރިޓައަރ ކުރައްވާފައެވެ.
އަލްފާޟިލް މުޙައްމަދު ނަޞީރު ހއ. އަތޮޅު އޮފީހާއި ގުޅިވަޑައިގެންނެވީ 26 މާރިޗް 1992 ގައި ތިލަދުންމަތީ އުތުރުބުރީ އަތޮޅު އޮފީހުގެ ސެކްރެޓަރީއެއްގެ މަޤާމަށެވެ. އޭގެފަހުން މުޙައްމަދު ނަޞީރު އަދާކުރެއްވި މަޤާމުތަކުގެ ތެރޭގައި އަތޮޅު އޮފީހުގެ ސީނިޔަރ ސެކްރެޓަރީކަމާއި، އަތޮޅުވެރިޔާގެ އެހީތެރިކަމާއި، އަތޮޅުވެރިޔާގެ އިސްއެހީތެރިޔާ ކަމާއި، އަތޮޅުވެރިޔާގެ މުއާވިންކަން ހިމެނެއެވެ.
އަލްފާޟިލް މުޙައްމަދު ނަސީރު ރިޓައަރ ކުރެއްވި އިރު ހުންނެވީ މި އިދާރާގެ ޑިރެކްޓަރެއްގެ މަޤާމުގައެވެ. އަލްފާޟިލް މުޙައްމަދު ނަޞީރު މެދު ނުކެނޑި 40 އަހަރަށް ވުރެ ގިނަދުވަހު ދައުލަތަށް ކޮށްދެއްވާފައިވާ އަގުހުރި މަސައްކަތަށްޓަކައި އަތޮޅު ކައުންސިލްގެ ނަމުގައި ވަރަށް އިޚްލާޞްތެރި ކަމާއެކު ޝުކުރު ދަންނަވަމެވެ.
އަލްފާޟިލް މުޙައްމަދު ނަޞީރު ސަރުކާރުގެ ޚިދުމަތަށް އެންމެ ފުރަތަމަ ވެންނެވީ 29 މާރިޗް 1979 ގައި އެއަރ މޯލްޑިވްސްގެ އިނގިރޭސި ސެކްރެޓަރީކަމުގެ މަގާމަށެވެ. އޭގެފަހުން އިނގިރޭސި ވިލާތުން ހެޑްމާސްޓަރކަމުގެ ކޯސް ފުރިހަމަ ކުރައްވާ 1981 ގައި ތަޢުލީމީ ދާއިރާއާ ގުޅިވަޑައިގެން ހއ. އަތޮޅު ތަޢުލީމީ މަރުކަޒުގެ ހެޑްމާސްޓަރކަމާއި، ށ. ކޮމަންޑޫގައި ހުންނަ އެ އަތޮޅު އަތޮޅު ތަޢުލީމީ މަރުކަޒުގެ ހެޑްމާސްޓަރކަން ކުރައްވާފައި ވެއެވެ.
ޝަރީފާ މުޙައްމަދު – ( ރިޓައަރ ކުރައްވާފައި )
އަލްފާޟިލާ ޝަރީފާ މުޙައްމަދު މެދުނުކެނޑި 34 އަހަރަށްވުރެ ގިނަ ދުވަހު ސަރުކާރަށާއި އަތޮޅަށް ޚިދުމަތް ކުރެއްވުމަށްފަހު 10 ޖަނަވަރީ 2021 ގައި ވަނީ ވަޒީފާއިން ރިޓައަރ ކުރައްވާފައެވެ.
އަލްފާޟިލާ ޝަރީފާ މުހައްމަދު ތިލަދުންމަތީ އުތުރުބުރީ އަތޮޅު އޮފީހާ ގުޅިވަޑައިގެންނެވީ 19 ޖޫން 1986 ގައި އަތޮޅުއޮފީހުގެ ރޭޑިޔޯޓެލްފޯން އޮޕަރޭޓަރެއްގެ ގޮތުގައެވެ. އޭގެފަހުން ޝަރިފާ މުޙައްމަދު އަދާކުރެއްވި މަޤާމުތަކުގެ ތެރޭގައި އޭރުގެ އަތޮޅު އޮފީހުގެ ކާތިބުކަމާއި، ސީނިޔަރ ކްލާކް ކަމާއި، އެސިސްޓެންޓް ސެކްރެޓަރީކަމާއި، ސެކްރެޓަރީކަން ހިމެނެއެވެ. އަދި ވަޒީފާއިން ރިޓައަރ ކުރެއްވިއިރު ހުންނެވީ މި އިދާރާގެ އެޑްމިނިސްޓްރޭޓިވް އޮފިސަރެއްގެ މަޤާމުގައެވެ.
އަލްފާޟިލާ ޝަރިފާ މުޙައްމަދު މިހާދިގު މުއްދަތެއްގައި މިއިދާރާއަށް ޚިދުމަތް ކުރައްވާފައިވާތީ އެކަން ފާހަގަކޮށް މި އިދާރާގެ ފަރާތުން ވަރަށް އިޚްލާސްތެރިކަމާއެކު ޝުކުރު ދަންނަވަމެވެ.
ފާތުމަތު ރަޝީދާ – ( ރިޓައަރ ކުރައްވާފައި )
އަލްފާޟިލާ ފާތުމަތު ރަޝިދާ 35 އަހަރަށް ވުރެ ގިނަދުވަހު ސަރުކާރަށާއި އަތޮޅަށް ޚިދުމަތް ކުރެއްވުމަށްފަހު 28 ފެބުރުއަރީ 2021 ގައިވަނީ، ވަޒީފާއިން ރިޓައަރ ކުރައްވާފައެވެ.
އަލްފާޟިލާ ފާތިމަތު ރަޝީދާ ތިލަދުންމަތީ އުތުރުބުރީ އަތޮޅު އޮފީހާ އެންމެ ފުރަތަމަ ގުޅިވަޑައިގެންނެވީ 22 ސެޕްޓެމްބަރ 1983 ގައެވެ. އޭގެފަހުން 1986 ގައި މެދުކެނޑުމަށްފަހު ދެވަނަ ފަހަރަށް ގުޅިވަޑައި ގެންނެވީ 18 ޖުލައި 1988 ގައި އަތޮޅުއޮފީހުގެ ކާތިބެއްގެ ގޮތުގައެވެ.
ފާތިމަތު ރަޝީދާ އަދާކުރެއްވި މަޤާމުތަކުގެ ތެރޭގައި އަތޮޅު އޮފީހުގެ ސީނިޔރކްލާކް ކަމާއި އެސިސްޓެންޓް ސެކްރެޓަރީ ކަމާއި ސެކްރެޓަރީކަން ހިމެނެއެވެ. ވަޒީފާއިން ރިޓައަރ ކުރެއްވިއިރު ހުންނެވީ މި އިދާރާގެ އެޑްމިނިސްޓްރޭޓިވް އޮފިސަރެއްގެ މަޤާމުގައެވެ.
އަލްފާޟިލާ ފާތުމަތު ރަޝީދާ އަތޮޅަށް ޚިދުމަތް ކުރެއްވުމުގެ އިތުރުން، ރައްޔިތުންގެ މަޖިލީހުގެ އިދާރާގެ ކާތިބު ކަމާއި، މިނިސްޓްރީ އޮފް ޖަސްޓިސްގެ 1 ނަމްބަރ ކާތިބުކަންވެސް އަދާކުރައްވާފައި ވެއެވެ.